11. október 2012 11:56

Fréttir af leikskólabörnum í Stórutjarnaskóla

Tjarnaskjól á iði

Það er börnum afar mikilvægt að hreyfa sig og fá kennslu sem hæfir þroska hvers og eins á þessu sviði líkt og öllum öðrum. Eldri nemendur leikskóla og 1. bekkur hafa verið í sundaðlögun tvisvar í viku og er því nú lokið í bili en verður svo aftur í vor. Nú taka við íþróttatímar í íþróttasalnum og þar læra börnin leiki og gera æfingar undir stjórn íþróttakennara.

Skólahópur er svo í samstarfi við 1.-4. bekk í útiskóla einu sinni í vikuog þar er líka mikil hreyfing. Yngri börnin fara líka einu sinni í viku í útikennslu þar sem þau læra um sitt nánasta umhverfi og fá að bagsa úti í náttúrunni. Í október ætlum við að vinna með stærðfræði í leikskólanum og æfa okkur að telja áfram og afturábak, vinna með tölur, spila, tefla, leika með kubba og margt fleira.