30. október 2020 13:14

Sigrún Jónsdóttir lætur af störfum

Fyrir 13 árum kom Sigrún Jónsdóttir leik- og grunnskólakennari til starfa hér við Stórutjarnaskóla. Sigrún hafði um árabil verið leikskólastjóri á Akureyri en hafði jafnframt réttindi til grunnskólakennslu þegar hún kom hér. Sigrúnu fylgdu ýmsar hugmyndir sem gott var að fá inn í skólastarfið, hún var dugleg að taka undir samþættingu leik- og grunnskólastigsins, sem hér hafði áður verið unnið að en fyrst og fremst fór hún fyrir útikennslu og umhverfisfræðslu hér við skólann.

Undir stjórn Sigrúnar hefur skólinn haldið 10 Umhverfis- og lýðheilsuþing, hlotið alls 5 Grænfána, verðlaunin "Varðliðar umhverfisins" og nú síðast var skólinn ásamt fleiri skólum tilnefndur til íslensku menntaverðlaunanna vegna þátttöku í verkefni Landverndar um vistheimt. Sigrún skilur því eftir sig mörg og merk spor í starfi Stórutjarnaskóla. Í þeirri von að Covid-höftum hafi verið aflétt þegar líður á vorönn er ætlunin að halda 11. umhverfis-og lýðheilsuþing skólans og mun Sigrún koma aftur til okkar nokkra daga vegna undirbúnings þess. Að því loknu fær Sigrún loksins varanlegt frí frá okkur.

Allir í Stórutjarnaskóla færa Sigrúnu Jónsdóttur sínar bestu þakkir fyrir samstarf og góð kynni.

S.l. miðvikudag var haldinn söngsalur Sigrúnu til heiðurs og í gær (fimmtudaginn 29. okt.) var hátíðarhádegisverður í matsal, þar sem allir komu saman og nemendur, deildarstjóri leikskóladeildar og skólastjóri þökkuðu Sigrúnu samstarfið á undanförnum árum. Myndir frá þessum viðburðum má sjá hér.

myndir: jr

Til baka