5. janúar 2021 09:42

Öðruvísi dagatal

Í desember tóku nemendur 1. - 3. bekkjar að öðru sinni þátt í “öðruvísi dagatali” sem er verkefni á vegum SOS Barnaþorpanna. Að þessu sinni tóku nemendur 4. - 6. bekkjar einnig þátt. Nemendur horfðu á stutt myndband á hverjum morgni. Myndböndin fjölluðu um börn og fjölskyldur þeirra, sem þegið hafa aðstoð Barnaþorpanna. SOS Barnaþorp eru starfrækt víða um lönd og styðja fjölskyldur sem lent hafa í ýmis konar erfiðleikum s.s. fátækt, stríði, náttúruhamförum eða ástvinamissi.

Myndböndunum fylgdi stafaþraut sem nemendur leystu og fundu lausnarorðið “Öll börn eiga rétt á öruggu heimili” sem við svo sendum í tölvupósti til samtakanna. Það á svo eftir að koma í ljós hvort við verðum dregin úr pottinum.
Hluti af verkefninu fólst í því að nemendur söfnuðu peningi með því að gera góðverk heima hjá sér og fá greitt fyrir. Þátttaka í því var ekki skylda en þeir sem tóku þátt í söfnuninni stóðu sig með prýði og söfnuðu hóparnir samtals 25.500 krónum. Upphæðinni hefur verið komið til skila til fræðslufulltrúa SOS Barnaþorpanna á Íslandi.

Verkefnið var uppspretta mikilla umræðna um réttindi og aðstæður barna víðsvegar í heiminum. Við í stofu eitt þökkum jákvæð viðbrögð foreldra og gott samstarf. Nemendur eru sammála um mikilvægi verkefnisins og hafa ákveðið að taka einnig þátt fyrir næstu jól.

Til baka