Stórutjarnaskóli vekur athygli

Skólastjórar af Austurlandi kynna sér skólastarfið

Fimmtudaginn 6. maí s.l. kom 19 manna hópur skólastjóra af Austurlandi til að kynna sér starf og skipulag Stórutjarnaskóla. Eins og flestum er kunnugt hefur skólinn verið í fararbroddi með samþættingu leik-, grunn- og tónlistarskóla og leiddi það starf til þess að fyrir tveimur árum var lögum breytt á Alþingi til að auðvelda slíkt og færa það í lög.

Mörg sveitarfélög huga nú að breytingum í þessa átt og er þá gjarnan litið til Stórutjarnaskóla sem fyrirmyndar. Heimsókn skólastjóranna í gær var einmitt af þessum toga. Fyrst fengu þeir kynningu skólastjóra á stofnanalegri uppbyggingu skólans og helstu einkennum skólastarfsins, en síðan var gengið um húsakynnin og aðstaðan og starfið skoðað. Að því búnu héldu skólastjórarnir áfram í Háskólann á Akureyri til frekara náms.