Örnefnaratleikur

Útiskóli fyrir alla

Mánudaginn 17. maí var skipulögð útikennsla fyrir alla nemendur Stórutjarnaskóla. Að þessu sinni fengu þeir að spreyta sig á ratleik sem gekk út á að finna allt að átta örnefni í umhverfi skólans. Nemendum var skipt í 9 hópa og hver hópur fékk í hendur upplýsingar í ákveðnu litakerfi um þá staði sem átti að finna. Fyrr í vetur, á degi umhverfisins, var farið í örnefnaskoðun og nú var meiningin að nemendur hefðu þá fræðslu til að byggja á. Staðirnir sem nemendur þurftu að finna voru: Startjörn, Fiskilækur, Bæjartjörn, Startjarnarmór, Langimelur, Garðabolli, Níphóll og Leirtjörn.

Þetta gekk mjög vel og athyglisvert var að fylgjast með því hvernig hóparnir skipulögðu framkvæmdir, hver og einn. Enda var fyrsti hópurinn ekki nema um 30 mínútur að hafa upp á átta örnefnaveifum og eina þeirra var að finna upp á Níphól. Síðan þurfti hver hópur að skila átta miðum í öruggar hendur við heimkomuna.

Ekki var laust við að þeir sem harðast lögðu að sér væru dasaðir og sveittir á eftir, á meðan aðrir fóru sér hægar og áttu sína orku enn að mestu eftir við heimkomuna.

Fleira fannst en örnefnaveifurnar, t.d. varð ein grágæs á vegi nemenda og hún lét ekkert raska sinni ró - fylgdist af yfirvegun með hamagangi nemenda. Myndirnar tala sínu máli.